na dvadeseti desetoga smo cijenjenon čitateljstvu ovega bloga predstavili mačju mafiju. na dvadesetiidrugoga desetoga smo rekli kako su stigli mućo i maleni kod mene. tot smo obećali reć i kako je stigla maška ča se zove ćićo. nisan ka naši političari koji obećaju, a ne ispunjavaju, pa evo danas svitu moj, dvi tri riči o ćići, e...

dočekala nas je na portunu nekoliko miseci nakon šta smo udomili muću i malene. jemala je oko dva miseca.

- di ste do sad? čekan vas više od po ure. (očima nan je govorila)
- asti gospu, ja i ovi mačić se poznajemo, samo još ne znan otkud. (prođe mi kroz glavu)

izila nan je po kila gavuna odma u startu. matere joj nije bilo nigdi na vidiku. odnili smo je doma s tin da to bude privremeno, ali narafski ostala je za stalno. znate već kako to gre kod mene sa maškama, e...

kroz ponistru smo joj vidili mater sa dva žuta mačića, a falija je sivi. sivi je narafski bila šinjorina ćićo. materi smo joj isto davali ist, ali je mačiće prinila na sigurnije misto čin su mrvu stasali. onda smo ih mogli samo s ponistre gledat. zato mi je bila poznata na portunu, e... upoznali smo se čin je došla na svit, e.

- ćićo je pobigla materi (rečen ja i znan da je upravo to istina)
- grrrrrrrrrrrrrrrrr (ćićo će ljutito)
- ma ne moš virovat da razumi (stvarno mi nije kjaro)
- ćićo je pobigla materi (ponovin za provjeru)
- grrrrrrrrrrrrrrr (odgovor je u istemu tonu, e)

svoje riči ponovin i sutra i prikosutra. stalno se idi na to, uvik ista pisma. ne moš virovat, razumi, pametna je to beštija, e.

svi jastučići na šapicama su joj crni. to morate znat, e. upravo sidin na cencu svoje poslovne katrige jerbo se ona raskomodila i zauzela veći dil. no, ko je ne bi pustija, a? ma ta maška je dobri duh ove mačje klape, e... inače, mući je mlađa sestra, a malenima koji više nisu maleni teta (ovo van je da razumite obiteljsko stablo, e).

eto svitu moj, volite dicu, beštije, cviće, ljude i život. stojte mi dobro i budite pozdravljeni, e...

notano o' xvii: 04.11.2004., 18:27